Isaac Bashevis Singer naceu en 1902 na vila polaca de Radzymin, que daquela formaba parte do Imperio Ruso, no seo dunha longa estirpe de rabinos. Viviu en Varsovia ata 1935, cando emigrou aos Estados Unidos. Porén, o seu país natal e a comunidade xudía sempre estiveron presentes na súa obra, escrita en yiddish. Recibiu o National Book Award en 1974 e o Premio Nobel de Literatura en 1978. Entre as súas obras destacan Satan in Goray, The Family Moskat e O mago de Lublin. O poder destrutivo pero tamén creativo das emocións é un dos temas máis característicos de Singer, quen describe nas súas obras como as familias se separan polas demandas dos novos tempos, dende a metade do século XIX ata a Segunda Guerra Mundial. Faleceu en 1991 en Florida.