Aubrey Fitz Gerald Bell (Cumberland, 1881 – 1950) estudou en Oxford, onde se familiarizou coa cultura grecolatina e coas literaturas italiana e francesa. Aprendeu éuscaro e iniciou as súas viaxes por España e Portugal en calidade de correspondente do diario Morning Post.
A súa identificación con estes dous países levouno a residir neles durante amplos períodos de tempo e a afondar na súa historia e nas súas culturas. Froito desta dedicación é este seu libro de viaxes Galicia vista por un inglés (1922). Entre a súa vasta bibliografía destacan os seus estudos e traducións ao inglés de Gil Vicente e mais de Frei Luis de León, os seus ensaios sobre literatura portuguesa e castelá e traballos de divulgación como A Study of the Spanish Renaissance (O Renacemento español, 1925).