Cando en 1933 os nazis queimaron en público milleiros de libros por consideralos “antialemáns”, o xornalista e escritor xermano Erich Kästner (1899-1974) viu cos seus propios ollos como ardían nas piras os seus poemas satíricos e a súa prosa de crítica social. Do lume salvouse Emil e os detectives, a novela para nenos que o catapultou ó éxito en 1929 e cimentou o seu renome como figura sobranceira da literatura infantil, recoñecido en 1960 co premio Hans Christian Andersen. Pacifista arrastrado a dúas guerras mundiais, neno eterno obrigado a vivir nun mundo feito por e para os adultos, Kästner foi ata a fin un optimista social convencido do potencial renovador da mocidade.