Rudyard Kipling naceu en Mumbai (India) en 1865. De pais británicos, foi criado por unha nanny portuguesa e un servente indio, que encheron a súa infancia de historias fabulosas e rimas hindús. Con sete anos enviárono a Inglaterra, onde viviu cuns titores terriblemente estritos, pero volveu á India con 16 anos, para traballar nun xornal de Lahore, e comezou a publicar historias.

Tras o seu casamento, Kipling estableceuse en América, e alá foi onde escribiu O libro da selva, publicado en 1894. Despois mudouse coa súa familia a Inglaterra. Alí morreu en 1936. Foi galardoado co Premio Nobel de Literatura en 1907.