Gottland compila unha serie de crónicas históricas, reportaxes e anécdotas sobre o período que vai dende a fin da Segunda Guerra Mundial ata o 2003, que retratan dunha forma erudita e amena a sociedade checa nunha época na que tivo que resignarse á falta de liberdades. Mariusz Szczygieł consegue dar cor a unhas historias reais que resultan máis interesantes ca a ficción.

A construción do monumento a Stalin máis grande do mundo, a ascensión e caída dunha estrela de cine da que Goebbels se namorou perdidamente, a lenda de Karel Gott, o Presley checo, o imperio económico de Bata ou os esforzos da sobriña de Kafka para fuxir do mito do escritor ofrecen un interesante material de partida para este libro.