Tito Lucrecio Caro naceu o ano 96 ou 94 a.n.e. e morreu arredor do 50, tal e como se desprende do breve testemuño achegado por Xerome no seu Chronicon. Este autor refire que Lucrecio se quitou a vida aos 44 anos, despois de sucumbir á loucura a causa dun filtro de amor; nos momentos intermitentes de lucidez tería conseguido escribir De rerum natura. Parece claro que esta alusión á posíbel tolemia de Lucrecio serve para encaixar a súa visión do amor contida no libro IV e tamén para desacreditar aqueles aspectos da súa doutrina que resultaban máis conflitivos.