Mehmed Uzun (1953-2007), un dos creadores da literatura kurda moderna, viviu en Suecia dende o ano 1977 até que regresou a Turquía en xullo de 2006. Escritor multilingüe e multicultural, con obras publicadas en kurdo, turco e sueco, publicou sete novelas en kurdo que foron traducidas a moitos idiomas. Na primavera de 2001 xulgárono (e absolvérono) pola novela Brillante coma o amor, negro coma a morte e o libro de ensaios Flores de granada. Nese mesmo ano recibiu varios premios á liberdade de expresión por parte da Asociación de Editores Turcos, o Instituto Kurdo de Berlín e a Pluma da Liberdade Torgny Segerstedt, un dos premios máis importantes de Escandinavia. Faleceu a causa dun cancro de estómago.