Aínda que naceu en Oxfordshire (Inglaterrra), Maria Edgeworth (1768-1849) foi a escritora angloirlandesa máis famosa do século XIX e pertencía á elite protestante que gobernaba en Irlanda naquel tempo. Seu pai foi un coñecido terratenente ilustrado, Richard Lovell Edgeworth (1744-1817), que casou catro veces e chegou a ter vinte e dous fillos. Maria recibiu unha sólida formación. Foi a amanuense e administradora de propiedades do seu pai, co que aprendeu economía, socioloxía e pedagoxía.

A influencia de Maria Edgeworth percíbese no eido literario no só no século XIX (Austen, William Makepeace Thackeray, Ivan Turgeniev, John Ruskin), senón que moitos políticos (Benjamin Disraeli, Thomas Carlyle) recoñeceron a súa débeda con ela e, se temos en conta o realismo e mérito de Castle Rackrent, a súa pegada chega até o século XX coa novelística de William Faulkner e o realismo máxico de Gabriel García Márquez. Mesmo se ten relacionado a falta de núcleo central e as dinámicas familiares na primeira obra de Maria Edgeworth co Ulysses de James Joyce (P. F. Sheeran). No caso da literatura ambientada en Galicia habería que relacionar a Maria Edgeworth coa novela de pazos, así como coa particular ironía de Álvaro Cunqueiro.