Joan Didion, nada en 1934 en Sacramento (California), incorporouse á redacción da revista Vogue ao final dos anos cincuenta co seu flamante título universitario en lingua e literatura; aquilo foi o trampolín dunha carreira xornalística e literaria que se prolongaría cinco décadas. A súa inconfundible sobriedade estilística e unha perspicacia fóra do común na observación do mundo granxeáronlle un merecido posto no canon da literatura estadounidense e o favor do público e a crítica. Inseparable da súa obra, a súa vida privada forneceuna ata o final de temas literarios: “Se escribo é unicamente para descubrir o que penso, o que miro, o que vexo e o que significa”. Joan Didion finou en decembro de 2021.