François Rabelais nace arredor de 1494 nunha familia acomodada e morre en París en 1553. Sobre 1520 é frade franciscano no convento de Fontenay-le-Comte, onde aprende grego e estuda humanidades. Ao prohibir a Sorbona o estudo do grego, por considerar que podía transmitir ideas heréticas, os superiores do convento confíscanlle os seus libros e acaba mudándose á orde dos beneditinos. Arredor de 1528 vai a París, onde cambia o hábito regular polo secular (sen autorización) e ten dous fillos. Máis tarde instálase en Lyon, onde publica obras científicas de antigos e contemporáneos e é nomeado médico do hospital. Co pseudónimo de Alcofribas Nasier (anagrama do seu nome) publica en 1532 Pantagruel, inmediatamente condenado pola Sorbona. Dous anos despois aparece Gargantúa e ten outro fillo.