Enea Silvio Piccolomini (Corsignano, 1405-Ancona, 1464) pasou á historia como papa co nome de Pío II. Polo que se pode deducir dos seus escritos e da súa traxectoria, debeu ser un home cunha gran facilidade para o trato persoal e o achegamento sedutor, así como para a dialéctica e a negociación.

Cando escribe a Historia de dous amantes, en 1444, Piccolomini está a piques de facer corenta anos. Estaba en proceso de aceptar que xa deixara atrás os seus anos mozos e que lle conviña esquecer os apetitos carnais para emprender a carreira eclesiástica con vistas a un maior progreso económico. A súa posición como hábil negociador político e escritor culto estaba ben estabelecida tanto en Italia coma nas terras do Sacro Imperio Romano Xermánico. De feito, pódese dicir que foi o principal persoeiro que lles levou aos alemáns os ideais culturais do Humanismo, movemento que el vira nacer en Italia.